ILOILO CITY- Nagpagwa sang direktiba ang Police Regional Office 6 nga dapat magsunod ang mga kapulisan sa road clearing partikular na sa pagparking.
Ini ang may kaangtanan sa una ginpahayag ni Liga ng mga Barangay President Irene Ong nga nahadlok sila magpanakop kun pulis ang nagaviolate.
Sa interview sang Bombo Radyo kay Police Lt. Col Joem Malong, iya ginpahayag nga wala sang exemption sa pagpatuman sang mando sang Department of the Interior and Local Government sa road clearing.
Suno kay Malong, kun may yara sang bayolasyon, nagakadapat nga isyuhan sang citation ticket ang mga pulis kun may yara sila sang nahimo nga bayolasyon.
Kun ginabalewala kag nagapangisog ang isa ka pulis nga sundon ang mga barangay officials sa road clearing, gilayun ini nga ipalab-ot sa Police Regional Office VI, ukon sa City kag Probinsyal nga talatapan agud mapasakaan sang kaso adminsitratibo.
Nagakadapat suno sa natungdan nga nagakadapat nga mangin ihemplo para sa kadam-an ang mga kapulisan sa patag sang pagtuman sang mga direktiba.
