BAGUIO CITY – Ginkanselar sang Baguio Flower Festival Foundation Incorporated (BFFFI) ang pagpatigayon sang ika-25 nga selebrasyon sang Panagbenga 2020, ang tuigan nga kapistahan sa Baguio City, bangud sa coronavirus disease 2019 (COVID-19).
Ini ang kasunod sang rekomendasyon nga ginhimo sang mga opisyal sa isa ka pagsinapol sang Inter-agency Task Force on the COVID-19 nga ginpamunuan ni Baguio City Mayor Benjamin Magalong, Department of Health (DOH) Cordillera, Department of Education (DepEd) Cordillera, Baguio City Police Office (BCPO), kag iban pa nga kaangot nga ahensya.
Sa report ni Bombo Glenda Bacungan direkta sa Bombo Radyo Baguio, iya ginpahayag nga indi lang ang Baguio City Government ang nagakahangawa sa madasig nga paglapta sang virus kundi pati na ang mga pumuluyo nga yara sa lugar, ilabi na bangud madamo sa mga turista nga nagapadulong sa Baguio ang may indi masigurado nga travel history kag medical background.
Suno sa inter-agency taskforce, posible nga ini nga mga turista ang mangin carrier sang COVID-19.
Labi man nga ginakahangaw-an ang paglapta sang balatian sa pagpatigayon sang Grand Street Dancing kag Grand Float Parade nga natalana kuntani sa Marso 28 kag Marso 29.
Nahibaluan nga ini na ang ika-duha nga kanselasyon sang Panagbenga 2020.
Una na nga gin-suspinde sang Baguio City Government kag BFFFI ang okasyon sa orihinal nga schedule sang Pebrero.
Kaangot diri, ginmandu man ni Magalong ang 14 ka adlaw nga temporary closure sang Baguio City Night Market sa Harrison Road, Baguio City.
Suspendido man ang Cordillera Administrative Region Athletic Association ukon CARAA Games.
