ILOILO – Ginapakansela ni Iloilo Gov. Arthur Defensor Jr. ang graduation kag recognition sang mga estudyante sa probinsya sang Iloilo bilang paagi agud nga indi na madugangan ang mga pasyente nga nagpositibo sa Coronavirus Disease 2019 (COVID-19).
Ini ang ginkasugtan sa pagsinapol nanday Defensor kaupod ang Local School Board kag ni Iloilo Schools Division Superintendent Dr. Roel Bermejo.
Sa interview sang Bombo Radyo kay Defensor, iya ginpahayag nga mas makapaayo nga ikansela anay ang pagpatigayon sang recognition, graduation kag iban pa nga school activities bangud sa kahangawa nga madamo ang mahimo malatnan sang virus.
Suno kay Defensor, ginkansela naman ang Western Visayas Regional Athletic Association Meet 2020 sa Aklan bangud sa nasambit nga health scare ilabi na nga nagtaas sa 24 ang mga COVID-19 positive.
Nahibalu-an nga magluwas sa school activities, ginapakansela naman sang gobernador ang pagpatigayon sang large-scale event.
