ILOILO CITY– Nagpapanaog sang memorandum circular si Iloilo City Mayor Jerry Treñas may kaangtanan sa health advisory para sa mga nagatrabaho sa Iloilo City Hall.
Sa interview sang Bombo Radyo kay Dr. Roland Fortuna, focal person for coronavirus disease 2019, iya ginpahayag nga santo sa nasambit nga memorandum circular imbes nga magpatigayun sang flag ceremony ang mga empleyado sang city hall, magapatigayun nalang ang mga ini sang pagdisinfect sang ila talatapan, duha ka beses sa isa ka adlaw.
Suno kay Fortuna, sa subong ginadumilian ang paggamit sang biometrics kag ang attendance ang ipaagi nalang sa logbook.
Pahayag pa ni Fortuna, kinahanglan nga may dala nga 70% alcohol ang tagsa ka empleyado, limitahan ang pagdala sang mga personnal visitors, wala sang sharing sang pagkaon kag utensils, sundon ang cough etiquette kag insakto nga paghugas sang kamot.
Dugang pa sang natungdan, ang mga empleyado nga nagamasakit ang gina-abisuhan nga magtenir sa ila puluy-an, kag kun nakakadto sa mga lugar nga may yara sang positibo nga kaso sang coronavirus disease 2019, magpatigayun sang self quarantine agud malikawan ang paglapta sang virus.
