ILOILO CITY – Isa ang patay samtang isa ang pilason sa shooting incident sa relocation site sa Brgy. San Isidro, Jaro, Iloilo City.
Ginbawi-an sang kabuhi si Eljohn Ledesma, 47, nga amo ang gintuyo sang mga wala pa nakilala nga riding-in-tandem suspects samtang nasalabat naman si Prince Jonard Macahilo, 20, nga nagabaligya sang isda.
Mismo ang bayaw sang biktima ang nagkumpirma nga ginbawi-an sang kabuhi si Ledesma nga tumandok sang Brgy. Bakhaw sa distrito sang Mandurriao apang nakapatindog na sang balay sa Brgy. San Isidro sa distrito sang Jaro.
Sa interview sang Bombo Radyo kay Rene, isa sa mga witness, iya ginpahayag nga nagapungko sa tricycle si Ledesma sang gindulugan sang duha ka mga suspek nga sakay sa motorsiklo.
Suno kay Rene, nagatalikod ang biktima sang ginpaarakan-luthang sang mga suspek kag nasalabat si Macahilo nga nagabligya sang isda.
Ang mga suspek ang nakasuksok sang jacket kun sa diin ang driver ang nakasuksok sang helmet samtang naka-hood naman ang gunman.
Wala naman sang tul-id nga ihibalo ang natungdan tuhoy sa background ni Ledesma apang ginkumpirma naman sang pamilya nga naka-agi preso ang biktima.
Matapos ang insidente, gilayon nga nagplagyo ang mga suspek padulong sa Brgy. Tacas sakay sa Yamaha Mio nga pink.
Si Ledesma ang naka-angkon sang mga pilas sa likod samtang sa paa naman ang pilas ni Macahilo.
Ginabanta nga pulo ka basiyo sang bala sang wala pa matumod nga armas-luthang ang nakuha sa crime scene.
