ILOILO CITY– Ginaduso sang isa ka konsehal sa syudad sang Iloilo ang posible pagpanaug sang multa sa mga persona nga wala nagasuksok sang face mask sa pampubliko nga mga lugar.
Sa interview sang Bombo Radyo kay Iloilo City Councilor Ely Estante, iya ginpahayag nga ang nasambit niya nga lihok ang yara na sa karun sa Committee on Health sang syudad.
Suno kay Treñas, una na nga naghingyo si Mayor Jerry Treñas kag nagduso man sang isa ka resolusyon ni Iloilo City Councilor Jay Treñas nga nagapangabay man sa publiko nga magsuksok sang facemask sa sining tion sang pandemic.
Suno kay Estante, iya na-obserbahan nga madamo man sa gihapon ang mga pumuluyo nga nagagwa nagakadto sa mga merkado kag yara sa dalan ang wala nagasuksok sang facemask.
Pahayag pa ni Estante, agud mas may ngipon ang executive order nga ginpagwa sang alkalde sang syudad, iya ginduso nga ang mga nagalapas sa pagsulundan ang magapangatubang sang penalidad.
Dugang pa sang natungdan, P500 sa tagsa ka bayolasyon ang mangin penalidad sang sin-o man nga madakpan nga wala nagasuksok sang mask sa pampubliko nga mga lugar.
