BUENAVISTA GUIMARAS– Naumpisahan na sang Local Government Unit sang Buenavista Guimaras ang pagpanghatag sang cash assistance sa idalom sang Social Amelioration Program.
Sa interview sang Bombo Radyo kay Buenavista Mayor Eugene Reyes, iya ginpahayag nga kahapon nakaumpisa na sila sa lima ka barangay kag subong nga adlaw nakatapos naman sila panghatag sang cash assistance sa lima pagid ka mga kabarangayan.
Suno kay Reyes, may yara pa sang mga kabarangayan nga natalana makabatun sang assistance kag ini ang ila patigayunon tubtob sa Huwebes nga adlaw.
Pahayag ni Reyes, halos 6,180 ang mga benipesyaryo sa 36 tanan ka mga kabarangayan sa Buenavista kag wala pa diri malakip ang Pantawid Pamilyang Pilipini Program santo man sa qouta nga ginhatag sa ila sang Department of Social Welfare and Development.
Dugang pa ni Reyes, sa tion nga makatapos na sila sa pagpanghatag magapatigayun sila sang liquidation kag igapasa sa DSWD ang listahan sang ila mga nahatagan.
Pahayag pa niya, mahimo sa masunod nga semana, makasugod naman sila panagtag sang social pension sa mga senior citizens sa ila banwa.
