STA. BARBARA, ILOILO – Pasakaan sang sampaw-sampaw nga kaso ang apat nga naulamid sa pagpalusot sang makahulubog nga ilimnon sa checkpoint sa Brgy. Agutayan, Sta. Barbara, Iloilo.
Matandaan nga kahapon sang hapon, na-intercept sang Criminal Investigation and Detection Group ang isa ka closed van, isa ka dump truck kag isa ka pick-up nga may nakapaskil nga essential goods kag medical supplies apang may karga nga makahulubog nga ilimnon.
Sa interview sang Bombo Radyo kay Police Col. Gervacio Balmaceda, pinuno sang Criminal Investigation and Detection Group 6, iya ginpahayag nga si Brgy. Kagawad Joel Salodares Jr. sang Zone 3, Pastillas St. sang banwa sang Sta. Barbara ang nagapanag-iya sang nakumpiska nga whisky.
Suno kay Balmaceda, sang nakaligad pa nga adlaw ini ginbakal sang barangay kagawad apang kahapon lang napangitaan sang paagi nga makarga sa truck ang 400 boxes sang 375 ml kag 100 boxes sang 750 ml nga ilimnon.
Ginpahayag ni Balmaceda nga may yara sang CIDG detective nga nakaplastar sa mga checkpoint kag bangud nga wala natabunan sang maayo ang likod sang truck, nasiplatan nga indi essential goods kag medical supplies ang karga sini.
Kasubong nga ginhungod nga ipalusot ang mga karton sang whisky kun sa diin ang iban nga ilimnon ang ginsulod pa sa karton sang energy drink.
Lakip sa pasakaan sang kaso amo ang driver sang closed van kag dump truck nga sanday Romnick Suaman kag John Ron Angelo, pahinante nga si Joefil Angelo kag ang barangay kagawad samtang wala naman nalakip ang driver sang pick-up.
