ILOILO CITY– Nagaplano si Antique Governor Rhodora Cadiao nga magpasaka sang protest batok sa mga opisyal kag katapo sang Bureau of Jail Management and Penology sa tion nga makitaan nga may kapaltahan ang mga ini sa pagtuman sang nagakaigo nga protocol.
Sa interview sang Bombo Radyo kay Governor Cadiao, iya ginpahayag nga ginmanduan na niya ang inter-agency task force sang Antique nga magpatigayun sang imbestigasyon kag kun mapamatud-an nga may yara sang paglapas sa protocol, gilayun nila nga ipadala sa talatapan ni Department of the Interior and Local Government Secretary Eduardo Año, ang nasambit nga protest.
Suno kay Cadiao, base sa mga impormasyon kag balita nga nakalab-ot sa iya talatapan, duha ka salakyan sang BJMP ang nagpadulong sa probinsya sang Antique kag nag-abot sa border sang Hamtic, nagpadulong sa banwa sang Barbaza kag nagkadto sa haya nga nahamtang sa banwa sang Culasi kag didto na nagtawag ang main office sang amo nga ahensya nga isa ka personnel ang nagpositibo sa Covid-19.
Pahayag pa ni Cadiao, gingamit sang amo nga mga persona ang ila passes bilang mga authorized persons outside residence nga ginahatag sa mga men in uniform kag mga medical personnels rason nga nakasulod ang mga ini sa probinsya sang Antique.
Dugang pa sang natungdan, luyag pa niya sa subong nga iverify ang impormasyon nga nagpadulong sa isa ka haya ang amo nga mga person bangud kun mapamatud-an, ini ang makabig klaro nga paglapas sang protocol, kag nagakadapat nga ang mga ini ang nagpabilin nalang sa ila quarters matapos sang ginpatigayun nga testing.
