ILOILO CITY-Ginpaidalom sa Extreme Enhanced Community Quarantine ang Barangay Sto. Niño Sur sa Arevalo, Iloilo City matapos nadugangan sang apat ang numero sang nagpositibo sa coronavirus disease 2019 (COVID-19).
Sa interview sang Bombo Radyo kay Iloilo City Mayor Jerry Treñas, iya ginpahayag nga ang extreme enhanced community quarantine ang magalawig sang 72 ka oras ukon tatlo ka adlaw.
Suno kay Treñas, ginhimo nga tatlo ka adlaw ang extreme quarantine bangud tatlo man ka adlaw ang hulaton antes mag-gwa ang resulta sang real-time reverse transcription polymerase chain reaction test nga ginpatigayun sa mga posible naka close contact kay WV Patient 66 nga driver sang Iloilo City Emergency Responder (ICER).
Pahayag pa sang alkalde, ang ipatuman nga polisiya sa nasambit nga barangay ang ginalakipan sang indi pagpahanugot sa mga pumuluyo nga makagwa sa barangay, indi pagpahanugot nga may iban pa nga mga tawo nga magsulod, pagpatuman sang istrikto nga stay-at-home order sa mga pumuluyo, mandatory testing, pagpadayun sang contact tracing, kag pagdumili sang distribusyon sang mga kinahanglanon kag medisina.
Magahatag man ang syudad suno kay Treñas sang tig-isa ka kilo nga manok, isa ka kilo nga karne sang baboy, lakip na ang mga ulutanon sa halos 2,015 ka mga panimalay.
Dugang pa sang alkalde, ang mga katapo lang sang City Health Office ang pahanugutan nga magdala sang mga bulong nga kinahanglanon sang mga pumuluyo.
