ANTIQUE – Dakup ang Ambulance driver nga nagtuyo sa pagpalusot sang ilimnon sa border control sang Iloilo kag Hamtic, Antique.
Ang nadakpan amo si Emmanuel Nallos Marron, 33 anyos sang Brgy. Olaga, Sibalom, Antique kag driver sang Ambulance nga ginapanag-iyahan sang Sibalom Local Government Unit.
Sa interiew sang Bombo Radyo kay Police Major Adolfo Pagharion Jr., hepe sang Hamtic Municipal Police Station, ginsugo si Maron nga magsugat sang tatlo ka Persons Under Monitoring gikan sa Zarraga, Iloilo.
Sang yara na sa border sang Iloilo kag Brgy. Fabrica, Hamtic, Antique, gin-check sang otoridad ang sulod sang Ambulance kag didto na natukiban ang karga nga siyam ka karton sang ilimnon.
Suno kay Pagharion, pasakaan gid sang nagakaigo nga kaso si Marron bangud sa paglapas sa Executive Order ni Gov. Rhodora Cadiao.
Bangud sini, ginpahayag ni Pagharion nga mas hugton pa gid ang pagbantay sa tanan nga border control sa palibot sang Antique agud nga indi na masulit pa ang insidente.
Gin-ako sang driver suno sa natungdan nga siya ang nagbakal sang mga ilimnon.
