STA. BARBARA, ILOILO– Ginpakamaayo sang Local Government Unit sang Sta. Barbara, nga hulaton nga makagwa ang resulta sang ginpatigayun nga Polymerase chain reaction test, sang ila mga kasimanwa nga nalakip sa mga repatriated Overseas Filipino Workers nga nagpauli.
Sa interview sang Bombo Radyo kay Sta. Barbara Mayor Rema Somo, iya ginpahayag nga ginpahibalo sila sang Regional Inter-Agency Task Force nga may tatlo sila ka mga repatriates nga nag-abot.
Suno kay Somo, apisar nagnegatibo na ang resulta sang test halin sa Manila, luyag nila makasiguro nga negatibo ang ila kasimanwa sa virus antes ang mga ini magpauli sa ila banwa.
Kun maggwa na ang resulta suno sa alkalde, mahimo nga ipaidalom sa facility quarantine ang mga repatriates ukon igahome quarantine nga separado sa ila pamilya kag strikto nga igamonitor sang banwa.
Kun nakahome quarantine naman suno sa natungdan, ang pamilya mismo ang magahatag sang pagkaon sa ila himata nga nagapaidalom sa quarantine.
