ILOILO CITY – Gin-amyendaran ang pila ka probisyon sang Executive Order No. 75 nga ginpagwa ni Iloilo City Mayor Jerry Treñas tuhoy sa pagpatuman sang General Community Quarantine sa syudad sang Iloilo.
Sa interview sang Bombo Radyo kay Treñas, iya ginpahayag nga lakip sa mga gin-amyendaran amo ang pagpatuman sang curfew nga 8:00 PM – 5:00 AM kag sa baylo, ini ang mangin 9:00 PM tubtub 4:00 AM.
Ika duha, ginatugutan na ang pag-ehersisyo sa Iloilo Esplanade apang kinahanglan lang nga sundon ang social distancing samtang ang ika tatlo amo ang amat-amat lang nga pagbukas sang commercial establishments agud malikawan ang pagdugok sang mga tawo.
Nagakadapat nga magpakita sang Identification Card sa tion nga magbakal sang makahululubog nga ilimnon kag business permit naman para sa mga nagabakal sang whole sale.
Gin-athag man sang alkalde nga hugot sa gihapon nga ginadumilian ang pagpatigayon sang cultural activities kaangay sang fiesta lakip man diri ang pagpatigayon sang misa.
Gindumilian ang pagbukas sang hotel kag motel magluwas lang kun ini ang ginatiniran sang repatriated Overseas Filipino Workers.
Apisar nga ginpaidalom na sa General Community Quarantine ang syudad sang Iloilo, nagakadapat sa gihapon nga sundon ang pagsuksok sang face mask kag pagsunod sa social distancing.
May kaangtanan naman sa hingyo sang mga manugbaligya sa merkado nga kaayuhon ang schedule, ginatun-an pa sa subong kun bala mahimo nga palawigon ang oras sang pagsirado sang mga merkado.
