ILOILO CITY- Tinguhaan sang Land Transportation Office 6 nga ipalab-ot sa central office, kag sa Department of Transportation ang sentimento sang publiko, tuhoy sa pagdumili sang pag-angkas sa motorsiklo.
Sa interview sang Bombo Radyo kay Land Transportation Office 6 Assistant Regional Director Atty. Gaudioso Geduspan, iya ginpahayag nga nahibaluan man niya nga kalabanan sa mga naga-angkas sa motorsiklo amo ang magpamilya, apang wala siya sang may mahimo bangud may ginpaguwa nga Memorandun Circular ang Department of Transportation.
Suno kay Geduspan, gin-istorya naman niya si Iloilo City Mayor Jerry Treñas kag si Iloilo Governor Arthur Defensor Jr. nga kun mahimo, amyendaran ang probisyon sang executive order nga nagapahanugot sa pag-angkasanay sa motorsiklo.
Ginpahayag ni Geduspan nga tinguhaan sang ahensya nga mahatagan sang solusyon ang nasambit nga problema apang sa subong, kinahanglan anay nga sundon ang mandu sang Department of Transportation.
