GUIMARAS– Ginahimuan na sang paagi sang Local Government Unit sang Guimaras nga makahatag sang mas maayo nga quarantine facility sa mga repatriates nga nagapauli sa ila probinsya.
Ini matapos, nakabatun sila sang reklamo tuhoy sa ginapahayag wala nakasulod sa standard nga quarantine facility.
Sa interview sang Bombo Radyo kay Vice Governor John Edward Gando, iya ginpahayag nga nagahanda na sila sang ila mangin sabat, sa formal complaint sang repatriate nga ginpalab-ot sa ila.
Suno kay Gando, nagapangayo sila sang pasaylo kun wala nakapasar sa standards, sang mga repatriates ang ila quarantine facility.
Pahayag pa ni Gando, nagapangita na sila sang mas maayo nga pasilidad sa diin may ginahitso na sila nga papeles kag ginakonsidera ang Guimaras State College, bangud may kapasidad ini nga maghatag sang individual quarantine area.
Sa subong suno sa natungdan, nagapadayun sang ila nabilin nga quarantine period ang mga repatriates kag natalana nga ipaidalom liwat sa testing, apisar makaduha na ka beses nga nagnegatibo ang mga ini.
Samtang ginpahayag man sang Bise Gobernador sang Guimaras, nga ginpangabay man nila ang mga sakayanon nga likawan sa subong ang paglayag padulong sa syudad sang Iloilo.
Ini matapos ginbawalan nga magbyahe ang mga pumpboat, bangud sa indi pagsunod sang physical distancing sang mga pasahero nga nagapila.
Suno kay Gando, magabalik lang ang byahe sang pumboat sa tion nga makapagwa na sang guidelines si Iloilo City Mayor Jerry Treñas.
