Ginaduso sa House Committee on Energy ang imbestigasyon may kaangtanan sa estado sang distribusyon sang elekrisidad sa syudad sang Iloilo.
Sa House Resolution (HR) 785 nga gin-file ni Ako Bisaya party-list Representative Sonny Lagon, iya ginpahayag nga importante nga maimbestigaran ang power supply nga gina-distribute sang More Electric and Power Corporation (MORE) agud mapat-od nga indi maapektuhan ang mga konsumidor kag ang mga pumuluyo sa syudad.
Sa report ni Bombo Dave Pasit direkta sa Kamara, ginpahayag ni Representative Lagon nga ang ‘rotating brownouts’ ukon ang asud-asud nga power interruption sa syudad ang bunga sang kakulang sang pasilidad sang More Electric and Power Corporation.
Ini ang magluwas pa sa ‘legal battle’ sa tunga sang More Electric and Power Corporation kag Panay Electric Company (PECO).
Partikular man nga gintumod ni Representative Lagon ang 13 ka oras nga power interruption nga na-eksperyensyahan sa distrito sang Jaro sang nagligad nga Domingo, Mayo 17.
Suno kay Lagon, antes nagbulos ang More Electric and Power Corporation bilang power distributor sa syudad, wala man sang natabo nga kaangay sini.
Ginpahayag man sang opisyal nga ang iya ginapanumdom amo lamang ang mga pumuluyo sa syudad nga amo ang labi nga apektado kun magpadayon ang malawig nga mga brownouts.
