MALTA– Obligado ang mga seafarers nga maggamit sang face mask, kag gloves sa tion nga magdul-ong sila sang goods nga ila karga sa pwerto, sang partikular nga lugar.
Sa interview sang Bombo Radyo kay Bombo International Correspondent Arnel Campaniel, isa ka seafarer direkta sa Malta, iya ginpahayag nga gina-paggamit sila sang face mask kag gloves para man sa ila safety.
Suno kay Campaniel, may yara lang sang taga Bureau of Quarantine nga nagakadto sa ila barko, agud magsekyar sang ila temperature kag kahimtangan, bilang kabahin snag preventive measures batok sa COVID-19.
Pahayag pa ni Campaniel, wala ginapahanugutan nga may iban nga persona nga makasaka sa ila barko, magluwas lang sa taga Bureau of Quarantine.
Sang una nga wala pa sang virus suno sa natungdan, makapanaog pa sila sa barko kag magbakal sang ila kinahanglanon, apang sa subong, ginapa-upod nalang ini sa provision kun ano man ang kulang nila sa barko.
Nahibaluan nga ang Malta ang may yara sang 610 ka kumpirmado nga kaso sang virus, 480 ang nakarekober kag anom ang patay.
