ILOILO CITY- Gin-athag sang More Electric and Power Corporation nga preventive maintenance ang rason kun nga-a may yara sang 13-hour power interruption nga magaluntad sa City Proper sa Dominggo, Mayo 31.
Sa interview sang Bombo Radyo kay Roel Castro, Presidente kag Chief Operations Officer sang MORE Power, iya ginpahayag nga halos tanan nga sub station ang may yara sang violation sa safety level.
Suno kay Castro, tuman na ka taas ang gas build-up sa transformers kag kun indi ini makaayo, mahimo ini magresulta sa total breakdown kag sa bahin sang General Luna sub station, may yara na sang oil leaks bangud sa gas buil-up.
Nagaplano man sila suno kay Castro nga magdugang sang duha ka sub station kun sa diin ang isa ang ipahamtang sa Mandurriao samtang ang isa naman ang ipahamtang sa Arevalo.
Antes ang pagtukod ukon pagbakal sang bag-o nga kagamitan, kinahanglan sa subong nga makaayo ang existing sub station, agud indi na magresulta sa mas dako nga problema.
Nagapangayo sang paghangop ang natungdan bangud kinahanglan nila nga kaayuhon ang guba para sa mas maayo nga serbisyo.
