Ginpahanumdom sang President sang Catholic Physicians Guild of the Philippines nga indi dapat mangin dependent ang mga tawo sa Artificial Intelligence (AI) bangud mahimo ini makapatalang.
Sa interview sang Bombo Radyo kay Dr. Rene Josef C. Bullecer nga amo man ang Country Director sang Human Life International (HLI) sa Pilipinas, iya ginpahayag nga wala sang emosyon kag wala sang kunsensya ang AI kaangay sang mga kinaiya nga may yara ang tawo.
Ginklaro sini nga bisan ang Simbahan nagasiling nga mahimo magamit ang AI, apang dapat mangin mabinantayon nga indi pag-isalig diri ang tanan nga buluhaton.
Ginbalikan man sini ang pahayag ni Pope Leo XIV nga gamiton ang AI para sa ikaayo, apang indi dapat pagkalimtan nga ang tawo mismo ang may built-in intelligence nga dapat gamiton.
Nahibaluan nga sa encyclical letter sang Santo Papa nga Magnifica Humanitas kag sa iban pa sini nga addresses, gina-sulit-sulit sini nga dapat magserbe ang AI para sa ikaayo sang katawhan kag indi dapat pagbuslan ang human judgment.
Una man nga ginpahayag sang Pope nga tools lamang ukon kagamitan ang mga makina kag indi tawo, gani nga wala sila sang eksperyensya, lawas, relasyon, emosyon, kag indi man makahangop sang paghigugma kag responsibilidad.
