ILOILO– Handa ang Iloilo City Government nga magbatun sang dugang nga repatriated Overseas Filipino Workers (OFWs) nga natalana nga mag-abot pa sa syudad sang Iloilo.
Sa interview sang Bombo Radyo kay Iloilo City Mayor Jerry Treñas, iya ginpahayag nga wala sang problema ang syudad sa pag-abot sang mga repatriates.
Suno kay Treñas may nagakaigo nga test kits ang syudad para sa COVID-19 testing, may yara man sang nagakaigo nga numero sang isolation areas ukon facilities, kag may nagakaigo man nga manpower nga amo ang magahulag agud matigayun ang testing.
Pahayag pa niya, pagabaklan nalang sang electric fans kag iban pa nga kinahanglanon ang isolation facity nga yara sa University of Iloilo.
Magluwas sa University of Iloilo kag sa Jubillee Hall sang syudad suno sa natungdan, magabukas man ang mga hotels agud magserbe nga quarantine facility sang mga repatriates.
