ILOILO CITY- Nanindugan si Iloilo 3rd District Rep. Lorenz Defensor nga madamo sang probisyon ang House Bill 6875 ukon Anti-Terrorism Bill nga wala nagasanto sa konstitusyon rason nga wala ini nagboto pabor sa pagpasar sang hagna nga nagatuyo nga amyendaran ang Human Security Act of 2007.
Ini matapos nga pasado na sa third and final reading sa Kamara ang kontrobersyal nga hagna sa diin 173 ka mamalidha ang nagpabor , 31 lang ang nagkontra kag 29 ang nag-abstain.
Sa interview sang Bombo Radyo kay Cong. Defensor, iya gintumod ang Section 29 sa nasambit nga hagna sa diin nasaad nga mahimo makapangdakop ang mga otoridad sang mga tawo nga ginasuspetsahan palang nga terorista ukon pagpatigayon sang warrantless arrest
kag mahimo man nga presohon ang mga ginapatihan terorista sa sulod sang 14 ka adlaw.
Magluwas diri, ginpahayag ni Defensor nga wala man nahatagan sang depinisyon ang tinaga nga terrorism sa nasambit nga hagna rason nga mangin mabudlay man ang pagtumod kun sin-o ang dapat kabigon nga terorista.
Suno sa mamalidha, maathag nga paglapas ini sa kinamatarung sang tawo nga magpalayag sang ila sentimento batok sa gobyerno apisar nga indi man ang mga ini kabahin sang terorista nga grupo.
Nahibaluan nga pila lamang sa probisyon sa nasambit nga hagna amo nga pamatbatan sang life imprisonment without parole ang sin-o man nga nagpakigbahin sa planning, training, preparation, kag facilitation sang terrorist act; pag-uyat sang mga butang nga konektado sa preparasyon para sa pagkumiter sang terorismo; ukon pagkolekta ukon paghimo sang dokumento nga konektado sa preparasyon sang terorismo.
Gin-ako naman ni Defensor nga nangin pressure sa ila ang nauna nga pagcertify ni Presidente Rodrigo Duterte sa nasambit nga hagna bilang “urgent”.
Suno sa mamalidha, wala niya ini nauyunan bangud ginpauntat ang kahigayunan nga makapatigayon sang debate agud maid-iran pa gid ang nasambit nga hagna.
Dugang pa ni Defensor, bersiyon sang Senado ang ila gin-adoptar nga hagna kag ginduso sa plenaryo kag wala na nahatagan sang kahigayunan ang bersiyon sang Kamara.
Nagalaum naman si Defensor nga mapungkuan ini liwat agud makay-o ang mga probisyon nga wala nagasanto sa konstitusyon antes pa ini mapirmahan ni Presidente Duterte agud mangin layi.
Gin-athag man niya nga ang indi niya pagpabor sa hagna ang wala nagakahulugan nga nagakontra ini sa gobyerno apang luyag lamang niya nga ang layi nga ginapasar sang Kamara ang pabor sa pumuluyo bangud ini ang katungdanan nila bilang mga mamalidha.
