ILOILO CITY – Indi matuod nga wala sang binuligan ang Iloilo City Police Office sa imbestigasyon sang National Bureau of Investigation sa twin shooting incident nga natabo sang Enero 19.
Sa ginpatigayon nga press conference, ginpahayag ni ICPO Director Police Col. Eric Dampal, nga nagabulig ang Iloilo City Police Office sa National Bureau of Investigation kun imbestigasyon ang pagahambalan.
Suno kay Dampal, antes pa man siya nagserbe bilang pinuno sang Iloilo City Police Office, nagapadayon na nga daan ang imbestigasyon apang ang pamilya Britanico kag Muller na mismo ang nagpili nga ang National Bureau of Investigation na lang ang maga-uyat sang kaso.
Bangud sini, ginpahayag ni Dampal nga wala na siya sang may mahimo kag ginatahod niya ang desisyon sang pamilya sang mga biktima.
Magluwas sa twin shooting, desidido man ang Iloilo City Police Office sa pagsolbar sa iban pa nga riding-in-tandem incidents.
Nahibalu-an nga napasaka na ang kaso nga Murder kag Theft batok kanday Police Cpl. Jerry Villanueva kag Police Cpl. Joseph Andrew Joven kag duha ka suspek nga wala pa nakilala.
Si Villanueva ang yara na sa kustodiya sang otoridad samtang at-large naman si Joven.
