ILOILO CITY- Nagapangayo sang paghangop ang More Electric and Power Corporation sa pumuluyo sang Syudad sang Iloilo tuhoy sa nagluntad nga sunod-sunod nga mga power interruptions.
Sa interview sang Bombo Radyo Iloilo kay Mr. Jonathan Cabrera, spokesperson sang More Power, iya ginpahayag nga nagapatigayon na sang imbestigasyon ang ila Technical Department sa diin may natipon na nga mga physical evidences kag ginahulat pa ang official report sang team.
Suno kay Cabrera, ini agud maathagan man ang publiko sa mga rason sang brown-outs kag ang posible nagakatabo nga pagpangsabotahe.
Ginaabi-abi naman sang More Power ang ipatawag nga committee hearing sang Iloilo City Council sa idalom sang Committee on Energy and Public Utility.
Suno kay Cabrera, ila ginakalipay ang nasambit nga inisyatibo sang konseho agud nga mahatagan man sila sang kahigayunan nga makasabat sa pumuluyo sang syudad.
Ginkumpirma naman ni Cabrera nga indi na madayon ang 13-hour maximum shutdown sa Mandurriao substation sa DOmingo, Hunyo 28 para kuntani sa pagpatigayon sang comprehensive preventive maintenance.
Suno kay Cabrera, ini bangud magapatigayon anay sang re-assessment kag re-evaluation ang technical team sang MORE Electric and Power Corporation sa Mandurriao Substation kag sa distribution network sini.
Kasunod ini sang unscheduled power outage sang Sabado, 20 Hunyo 2020 bangud sa tatlo ka mga major faults sa Mandurriao Feeder 4 nga nagresulta sang malawig nga brownout.
Wala pa sang schedule kun san-o dayunon sang MORE Power ang nasambit nga maintenance.
Prangka naman nga ginpahayag ni Cabrera nga madamo pa sang brown-out nga magaluntad sa Syudad sang Iloilo.
Suno kay Cabrera, ini ang kabahin sang balor 1.8 billion pesos nga pag-upgrade sang bulok nga mga sistema kag kagamitan.
Pahayag pa niya, realidad ini apang suno sa iya, ang pagluntad sang mga brown-outs ang nagakahulugan sang mas madamo nga repair kag preventive maintenance.
Nag-ayo man ini nga hatagan pa gid sila sang tatlo ka tuig agud nga makaayo ang tanan nga gubaon kag lauman nga sa pag-abot sang panahon, wala na sang magaluntad nga brown-outs sa syudad.
