ILOILO – Nagahingyo sang kooperasyon si Gov. Arthur Defensor Jr. agud nga wala sang local transmission sang COVID-19 sa probinsya sang Iloilo.
Sa interview sang Bombo Radyo kay Defensor, iya ginpahayag nga ginadumili-an na sa subong ang home quarantine agud nga indi na malatnan sang virus ang mga himata sang Locally Stranded Individuals ukon repatriated Overseas Filipino Workers.
Suno kay Defensor, protocol na nga sa tion nga may returning residents sakay sa barko ukon sa eroplano, gilayon sila nga ginasugat sang salakyan sang tagsa ka Local Government Unit agud dal-on sa quarantine facility kag ipaidalom sa COVID-19 test.
Ginpahayag ni Defensor nga kun sadto, ginapahanugutan ang home quarantine apang bangud nga may iban nga wala nagasunod sa protocol, automatic na nga sa quarantine facility magatinir ang returning residents.
