ILOILO – Kaangay kahugot sa implementasyon sang enhanced community quarantine ang pagpatuman sang border restriction sa probinsya sang Iloilo apisar napaidalom na ang bug-os nga probinsya sa modified general community quarantine.
Sa Brgy. Aglalana sa syudad ang Passi, ang border sang Iloilo kag Capiz, maid-id nga inspection ang ginasigurado sang mga kapulisan nga assigned sa lugar.
Sa interview sang Bombo Radyo kay Police Executive Master Sergeant Noel Bernabe, OIC Deputy Chief of Police sang Passi City Police Station, iya ginpahayag nga naga-convoy gid ang kapulisan sang syudad sang Passi agud madul-ong sa masunod nga banwa ang nga food delivery truck nga halin sa gwa sang Western Visayas.
Ginapat-od suno kay Bernabe nga indi na magdulog ang amo nga mga salakyan samtang padulong sa ila destinasyon.
Kun yara sa border control point, mahimo man makapanaug ang driver kag pahinante agud magkaon, magpangihi, kag matsekyar ang body temperature.
Sa bahin naman sang Balasan, Iloilo, hugot man ang pagbantay sa Brgy. Kinalkalan agud indi makaagi ang mga returning residents sang Iloilo City, Iloilo Province, kag Guimaras nga nagikan sa probinsya sang Capiz.
Sa interview sang Bombo Radyo kay Police Executive Master Sergeant Eden Diorda, hepe sang Balasan Municipal Police Station, iya ginpahayag nga nakahangop naman ang mga tawo rason nga wala sang nagapasaway sa border control point.
Apang sa naga-plano nga maglaktod sa Pilar, Capiz agud makalusot kag makasulod sa border sang Iloilo, ginpahayag sang natungdan nga responsibilidad sang mga barangay malapit sa border nga i-monitor ang mga tawo nga naga-agi.
May dugang man nga augmentation force nga ginpadala sa lugar agud matsekyar ang tanan nga salakyan.
