MIAGAO, ILOILO – Nakilala na ang rebelde nga napatay sa engkwentro sa tunga sang Philippine Army kag New People’s Army sa Sitio Lay, Brgy. Dalije, Miagao, Iloilo.
Ini matapos nga mismo ang pamilya ang positibo nga nagkilala sa bangkay nga si Malvin Christian Cruz, alyas Lean ukon Lucas, 21 anyos sang Brgy. San Antonio, Oton, Iloilo.
Sa interview sang Bombo Radyo kay Lt. Col. Joel Benedict Batara, commander sang 61st Infantry Battalion sang Philippine Army, iya ginpahayag nga si Cruz ang kilala nga campus student activist kag nagaserbe nga Team Leader sang Squad 3, Suyak Platoon, Southern Front, Komiteng Rehiyon-Panay.
Suno kay Batara, si Cruz ang 1st year Bachelor of Science in Statistics Circa sa University of the Philippines Visayas –Miagao Campus sang 2015-2016 kag nangin aktibo nga miyembro sang League of the Filipino Students kag IBON Foundation nga isa ka Non-Government Organization.
Ginpahayag ni Batara nga naga-edad pa lang sang 17 anyos si Cruz sang nagsulod sa New People’s Army kag siya naman amo ang nagapang-recruit sang dugang nga miyembro.
Antes pa man ang engkwentro, may yara sang nagpalab-ot sang impormasyon tuhoy sa hideout sang mga rebelde nga nagapatigayon sang recruitment sa banwa sang San Joaquin kag Miagao.
Pagkatapos sang engkwentro sang Hunyo 29, nakita sa encounter site ang bangkay ni Cruz nga may multiple gunshot wounds lakip na ang isa ka M16 rifle.
Ang natabo kay Cruz suno sa natungdan ang patimaan nga padayon ang recruitment sang New People’s Army ilabi na sa mga pamatan-on.
