ILOILO CITY- Tuman nga importante ang paggiya sang ginikanan sa tagsa ka mga kabataan sini nga new normal setup nga pagsugod sang klase para sa school year 2020- 2021.
Sa interview sang Bombo Radyo kay Martites Capilitan, education program supervisor sang Schools division of Iloilo, iya ginpahayag nga sa pagpatigayun sang nagkalain-lain nga modalities kinahanglanon nila nga mga manunudlo ang bulig sang tagsa ka ginikanan.
Suno kay Capilitan, kinahanglan man nga magiyahan ang bata sa oras na sang iya klase sa partikular nga adlaw lakip na ang pagsabat sa mga worksheet pagkatapos sang lesson presentation.
Ginpahayag ni Capilitan nga kadungan sang pagpanagtag sang worksheets, may yara man sila sang igalakip na schedule sang radio ukon tv based instructions agud mahibaluan sang tagsa ka ginikanan ang igsakto nga oras sang radio class sang ila kabataan.
Dugang pa sang natungdan, ang iban nga output sang mga estudyante ang mahimo man nga ma upload sang mga ginikanan sa platform nga igahatag sang manunudlo.
