ILOILO CITY – Nakigkita pa ang Officer in Charge sang Iloilo Fish Port Complex kay Iloilo City Mayor Jerry Treñas apisar nagpaidalom ini sa real-time reverse transcription polymerase chain reaction (RT-PCR) test.
Sa exclusive interview sang Bombo Radyo kay Engineer Reynaldo Calayag, Officer in Charge sang Iloilo Fish Port Complex, iya ginpahayag nga kahapon nagpaidalom ini sa nasal swab test matapos nagpositibo sa Coronavirus disease 2019 (COVID-19) ang duha ka nagatrabaho sa lugar sa diin isa sa ila ang napatay.
Suno kay Calayag, katuyuan sang pakigkita niya sa alkalde amo ang pagplastar sang mga protocols nga ipatuman sa sulod sang Iloilo Fish Port Complex.
Nahibaluan nga naka-home quarantine pa kuntani si Calayag apang nakigkita pa ini sa alkalde.
Sa subong suno sa natungdan, nagapadayon ang disinfection sa lugar.
Ginkumpirma naman ni Mayor Treñas nga nakigkita sa iya ang Officer in Charge sang Iloilo Fish Port Complex.
Sa interview sang Bombo Radyo kay Treñas, iya ginkumpirma nga nakigkita sa iya si Engr. Calayag sa diin ila gin-istoryahan ang mga himuon nga tikang sa sulod sang Iloilo Fish Port Complex agud indi maglapta ang virus.
Lakip man sa ila naistoryahan amo ang pagbalik sang operasyon sang Iloilo Fish Port Complex 11:59 bwas sa gabi.
Gin-athag man sang alkalde nga may shield ukon transparent plastic cover ang iya opisina sang nag-atubang siya sa natungdan.
May ginpatigayon man sang disinfection suno kay Treñas sa tion nga may magpadulong sa iya opisina.
