Kumpirmado nga napatay ang isa ka tumandok sang Buenavista, Guimaras bangud sang massive explosion nga nagluntad sa Beirut, Lebanon.
Ang biktima amo si Milagros Sumaculob, 65 anyos, kag 25 na ka tuig nga nagatrabaho bilang domestic helper sa Beirut.
Sa exclusive interview sang Bombo Radyo kay Gen Marie Sumaculob, umagad sang biktima, iya ginpahayag nga katapusan niya nga naistorya ang iya ugangan sang Agosto 3.
Sang nabatian ang balita may kaangtanan sa Beirut explosion, gilayon nga nagpakig-angot ang pamilya Sumaculob kay Milagros apang wala na ini nagasabat sa iya cellphone.
Sang ulihi, isa ka tawo nga nagahingalan kay Muhammad ang nagsabat sa cellphone kag nagpahayag nga nakit-an niya si Milagros nga nagahuray-ad sa dalan, duguon, kag wala na sang pangalibutan.
Gindala ini sa ospital apang wala ginbaton sang tatlo ka pasilidad bangud gutok na ang mga pasyente nga lunsay biktima sang duha ka magkasunod nga paglupok sa port area.
Base sa pahayag sang employer, sang natabo ang insidente, mga lima ka minutos pa lang nga nakagwa si Milagros gikan sa balay nga ginatrabahuan bangud mapauli na kuntani ini sa iya apartment.
Karsada lang ang antad sang nahamtangan ni Milagros kag sang port area kun diin natabo ang massive explosion.
Gin-turn over ang cellphone kag gamit sang biktima sa iya employer kag nagpasalig ang employer sa pamilya nga ipadala ang bangkay sa Pilipinas.
Ginalauman nga maga-abot ang bangkay sa Manila sa Agosto 9.
Nahibaluan nga mapauli na kuntani si Milagros sa Pilipinas sa Disyembre kag indi na magbalik sa Lebanon bangud sang ginakahangaw-an nga ginamo sa amo nga pungsod.
