ILOILO CITY – Palawigon pa sang tatlo ka adlaw ang lockdown sa pila ka mga barangay sa syudad sang Iloilo.
Sa interview sang Bombo Radyo kay Iloilo City Mayor Jerry Treñas, magapabilin ang lockdown sa mga masunod:
- Rizal Pala Pala 1, Iloilo City Proper
- Rizal Pala Pala 2, Iloilo City Proper
- Tanza Baybay, Iloilo City Proper
- San Juan, Molo
- North Baluarte, Molo
- Cuartero, Jaro
Santo sa nangin assessment sang COVID-19 team sang syudad kag sa gin-aprubahan sang alkalde, palawigon man sang tatlo ka adlaw ang lockdown sa BPO company nga IQOR sa distrito sang Mandurriao kag amo man sa Iloilo Terminal Market.
MAYOR TREÑAS SA TAGDUMALAHAN SANG FISH PORT NGA INDI MAKATUKOD SANG COMPLIANCE TEAM: “RESIGN”
Ginhangkat naman ni Mayor Treñas ang nagadumala sa Iloilo Fish Port Complex nga mag-resign sa pwesto kun indi makasarang sa pagtukod sang compliance team nga amo ang magapatuman sang health protocol.
Sa interview sang Bombo Radyo kay Treñas, iya ginpahayag nga subong nga hapon, may nakalab-ot sa iya nga impormasyon nga ang Iloilo City Government pa ang ginabasol kun ngaa tubtob subong, wala pa sang compliance officers nga amo ang maga-monitor sang fish port.
Ginpakamalaot sang alkalde ang amo nga impormasyon kag ginpahayag nga indi ini insakto bangud indi ini obligasyon sang syudad kundi iya sang fish port.
May kaangtanan diri, ginmandu ni Mayor Treñas nga palawigon ang lockdown sa fish port kag indi pagbuksan sa publiko tubtob nga wala sang mapresentar ang management nga compliance officers.
Nahibaluan nga subong kuntani nga adlaw natalana nga i-lift ang lockdown sa lugar.
Liwat man nga nagpanawagan ang alkalde sa mga residente sa syudad nga nakaagi transact sa Iloilo Fish Port Complex nga magpadulong sa Iloilo Jubilee Hall bwas sa aga para sa libre nga swab test.
Hatagan sang prayoridad ang taga-syudad apang akomodaron man ang taga-probinsya sang Iloilo kun magtawhay na ang sitwasyon.
