DUEÑAS, ILOILO – Patay ang 47 anyos nga mangunguma matapos gintiro sang riding-in-tandem suspects sa Brgy. Jagdong, Dueñas, Iloilo.
Sa interview sang Bombo Radyo kay Police Captain Marvin Buenavista, hepe sang Dueñas Municipal Police Station, iya ginpahayag nga ginsundan sang mga suspek ang biktima nga si Rey Ferrer nga residente sang nasambit nga banwa.
Suno kay Buenavista, sang amo nga tion, padulong sa isa ka baptist church si Ferrer sakay sa motorsiklo kaupod ang iya tiayon kag anak.
Sang nagdulog ang motorsiklo kag nakapanaog na ang mag-iloy, nagdulog man ang motorsiklo nga ginasakyan sang duha ka mga suspek kag ginluthang sang maka-isa ka bes ang biktima.
Gilayon nga nagpalagyo ang mga suspek matapos ang insidente kun sa diin nakita sa crime scene ang isa ka basiyo sang .45 caliber pistol.
Indi pa maathag ang motibo sa pagpatay sa biktima nga naka-angkon sang pilas sa likod nga naglapos sa iya dughan.
Nadakpan naman ang driver sang motorsiklo nga ginkilala kay Eugene Intoy, 43 anyos sang nasambit man nga banwa.
Sa subong, nagapabilin nga at large ang gunman.
