ILOILO CITY – Iga-diretso sang isa ka employer sa syudad sang Iloilo ang iya Philippine Health Insurance Corporation (PhilHealth) contribution sa Korte sa baylo nga ibayad sa mismo nga ahensya.
Sa interview sang Bombo Radyo kay Engineer Nilo Jardeleza, iya ginpahayag nga ini ang inisyatibo nga iya napensaran sa tunga sang mga anomaliya kag lapnagon nga korapsyon sa nasambit nga ahensya.
Ini ang santo man sa iya konsultasyon sa pila ka mga abogado kag hukom.
Magluwas sa mga iregularidad, base sa nagapadayon nga imbestigasyon sa Senado kag pahayag ni PhilHealth acting senior vice president for actuarial services Nerissa Santiago sang Agosto 4, mahimo maubusan sang pondo ang PhilHealth sa 2022 bangud sang COVID-19 pandemic.
Bangud sini, wala sang kasiguraduhan kun diin nagakadto ang kwarta sang publiko kag wala man sang pasalig nga magabalik sang patas sa mga tawo ang ila kontribusyon.
May kaangtanan diri, isa ka ‘silent but strong protest’ ang himuon ni Jardeleza kag sang iya mga empleyado kun sa diin magapasa sila sang sulat sa PhilHealth kun sa diin ipahayag nga sa Korte sila magabayad samtang wala pa natapos ang korapsyon sa ahensya.
“Masulat ako sa PhilHealth nga ‘solbara ninyo anay ang problema nga ini.’ Kay wala na ini sang kasiguraduhan subong. Ipresentar ko sa PhilHealth nga sa Korte ako nagbayad. It is a silent protest, mabakod ini nga protesta… subtle but very strong protest nga ang mga pumuluyo wala nagasalig sa agency (PhilHealth),” pahayag ni Jardeleza.
Suno pa sa natungdan, kun magpadayon ang anomaliya sa PhilHealtth, maabot ang tion nga baklon na lang sang mga tawo ang ila health insurance.
“Isa pa gid ini ka protesta nga ang mga pumuluyo nagasunod sa layi pero wala na sang pagsalig. Maabot ‘ni ang tion nga bisan sa Korte, ang tawo indi na magbayad kay wala na sang kasiguraduhan. Kami ya, mabakal na lang kami sang health insurance siguro.”
Ginsigurado man ni Jardeleza nga sa iya himuon, wala sang may malapas sa layi kag indi man pagtapakan ang National Health Insurance Act of 1995.
