ILOILO CITY – Istrikto nga gina-monitor ang mga pasahero sa Parola Wharf agud mapat-od nga tanan ang nagasuksok sang face mask kag face shield.
Ini matapos nangin epektibo na subong nga adlaw, Agosto 15, ang mandu sang Land Transportation Franchising and Regulatory Board (LTFRB) nga dapat magsuksok sang face shield ang tanan nga pasahero, konduktor, kag driver sang pampubliko nga salakyan agud malikawan ang posibilidad sang transmission sang coronavirus disease 2019 (COVID-19).
May kaangtanan diri, duha ka pasahero nga residente sang banwa sang Jordan, Guimaras nga wala nagasuksok sang face shield ang ginsita sang otoridad kag ginpapanaug sa pumpboat.
Sa interview sang Bombo Radyo kay Marilyn Marañon, isa sa mga nagatsekyar sa mga pasahero nga nagapadulong sa probinsya sang Guimaras, iya ginpahayag nga may yara gid sang nagarason nga nalipatan lang ang face shield.
Magluwas diri, wala naman sang salawayon suno sa natungdan kag wala man sang naga reklamo sa pagsulundan bangud well-informed naman ang kadam-an sa mga pasahero.
May mga personnel sang Philippine Coast Guard (PCG) nga yara sa lugar nga amo ang nagabantay sa mga tawo. #
