BAROTAC VIEJO, ILOILO – Wala na sang kabuhi sang nasapwan ang 16 anyos nga dalagita nga gintabunan sang hilamon sa higad sang creek sa Brgy. San Lucas, Barotac Viejo, Iloilo.
Ang biktima amo si Jenevee Balleza Carrera, 16 anyos sang nasambit nga lugar.
Suno kay Police Captain Ken Albert Lepsia, hepe sang Barotac Viejo Municipal Police Station, antes ang insidente, nagtanyag ang 30 anyos nga suspek nga una nga nakilala sa hayo nga Alog nga updan ang biktima sa pagpauli sa ila balay apang suno sa suspek, hinali lang siya nga ginkaros sang dalagita sa wala nahibalu-an nga rason.
Ginpahayag ni Lepsia nga naakig ang suspek sa dalagita rason nga ginkuga niya ang biktima tubtub nga mapatay.
Padayon pa ang imbestigasyon sa posiblidad nga ginhimuslan pa ang dalagita antes patyon kag ginbilin sa higad sang creek.
Ginpahayag naman ni Joe Faith Balicao, paka-isa sang dalagita, nga santo sa iya nahibalu-an, nakita pa sang iloy nga yara sa ila balay ang biktima sang gab-i antes nasapwan ang biktima nga manug Senior High School na kun tani.
Suno kay Balicao, pagka-aga, nabalahuba ang tuhoy sa natabo rason nga ila ginpangita ang biktima tubtub nga nasapwan ang bangkay sang dalagita.
Ginpahayag ni Balicao nga kasubong nga hungod nga gintago ang bangkay sang biktima bangud nga gintabunan ini sang hilamon kag sa crime scene, may yara pa sang ginunting nga nakita.
Indi naman makumpirma sang natungdan kun ginhimuslan ang iya paka-isa nga subang sa apat ka mag-ulutod.
Suno naman sa isa sa mga residente nga si Dante Evangelista, remedyo heneral lang ang suspek kag bulag na sa asawa.
Ang biktima naman suno kay Evangelista ang naga-eskwela kag yara na sa Senior High School.
