ILOILO CITY - Wala na gina-isa isa ang bag-o nga coronavirus disease 2019 (COVID-19) cases sa bag-o nga case bulletin nga ginapagwa sang Department of Health Region (DOH) VI. 

Sa interview sang Bombo Radyo kay Dr. Jessie Glen Alonsabe, pinuno sang Regional Epidemiology and Surveillance Unit (RESU) sang DOH Western Visayas, iya ginpahayag nga ginsunod lang sang ila talatapan ang format ukon template sang central office sang DOH.  

Kun matandaan sang nagligad nga case bulletin nga gina-isyu sang ahensya, nakabutang ang breakdown sang mga COVID-19 cases sa kada banwa sa probinsya kag distrito sa syudad, kag gina-report man ang patient code, edad, sex, address, kag status sang nagpositibo sa virus kun ini ang naka-home quarantine ukon naka-facility quarantine. 

Samtang, ang ginpagwa naman nga bulletin halin sang Agosto 7 ang naga-indikar lang sang kabug-usan nga numero ang active cases, bag-o nga kumpirmado nga kaso, kag 
gina-categorize kun pila ang nalakip sa Authorized Persons Outside Residence (APOR), returning overseas Filipinos (ROFs), kag Locally Stranded Individuals (LSIs). 

Apisar madamo nga mga pumuluyo ang nagareklamo sang bag-o nga template sang case bulletin bangud indi nila mahibal-an kun may yara sang bag-o nga COVID-19 case sa ila distrito ukon banwa, ginpahayag sang DOH Region VI nga gina-engganyo sang central office ang tanan nga center for health developments (CHDs) nga sundon ang bag-o nga template para sa "uniformity" sa pagpagwa sang bulletin.