MANILA – Si Health Secretary Francisco Duque III ang ginatudlo nga “godfather” sang mafia sa Philippine Health Insurance Corporation (PhilHealth).
Ini ang alegasyon sang whistleblower nga si anay PhilHealth anti-fraud officer Thorrsson Montes Keith sa ginpatigayon nga hearing sa Senado kahapon, Agosto 18.
Suno kay Keith, si Duque ang nag-apruba sa appointment sang executive officials nga amo ang ginakuno-kuno nga mga miyembro sang sindikato nga grupo kag ang nagapangurap sa sulod sang ahensya.
Ginpahayag man ni Keith nga bilang chairman sang PhilHealth Board of Directors nga nakauyat man sang nagkalain-lain nga key positions sa PhilHealth halin sang 2001, mas nakahibalo kag mas mahapos kay Duque nga makit-an ang mga iregularidad sa ila talatapan.
Ang amo nga alegasyon ni Keith ang gin-ugyunan man ni PhilHealth regional vice president Dennis Adre nga nagpahayag man nga ang health secretary amo ang lider sang mafia sa likod sang mga anomaliya kag lapnagon nga korapsyon.
Gilayon naman nga nagpanindugan si Duque nga indi matuod ang tanan nga pahayag ni Keith.
Wala sang basehan kag pato-pato lang ang amo nga alegasyon suno sa health secretary ilabi na bangud suno sa iya, mahapos lang ang magpasibangod kun wala man sang ebidensya.
Ginpahayag man ni Duque nga wala nadulaan sang kapin P154 billion nga pondo ang PhilHealth bangud sa korapsyon kag ini ang napamatud-an na sang nagligad nga pagsinapol sang Blue Ribbon Committee sang 2019.
Paathag ni Duque, ‘regular kag systematic’ ang pag-release sang benefit payments sa mga benepisyaryo nga may yara sang kompleto nga requirements.
Liwat man nga nagdepensa si Duque nga ‘zero’ ang iya tolerance sa korapsyon nga amo subong ang sentro sang imbestigasyon sang Senado, House of Representatives, kag Presidential Anti-Corruption Commission.
