ILOILO CITY – Nagapanindugan si Punong Barangay Nelson Muñoz sang Salvacion Habog-Habog, Molo, Iloilo City nga wala sang malain nga record sa ila lugar ang solterito nga ginluthang-patay sa sang riding-in-tandem suspects samtang yara sa sulod sang computer shop.
Sa interview sang Bombo Radyo kay Muñoz, iya ginpahayag nga mahimo nga mistaken identity lamang ang natabo bangud nga sa iya pagkilala, isa ka maayo nga bata ang biktima nga si John Paolo Yson.
Suno kay Muñoz, sa pila ka tuig nga pagtinir sang pamilya Yson sa ila barangay, wala naulamid sa krimen ang biktima.
Ginpahayag man ni Muñoz nga bisan ang mga barkada sang biktima ang wala man naulamid sa krimen.
Sa pagkamatuod suno sa Punong Barangay, ginapangita kag ginasugat gid sang amay sa tion nga magab-ihan sa pagpauli ang biktima.
Kasunod sang natabo, nagpakig-angot gilayon si Mayor Jerry Treñas sa natungdan agud mahatagan sang bulig ang pamilya.
Suno naman sa abyan nga nagpahinago lang sa pangalan nga Nonoy, mabuot kag mahuluy-on ang biktima.
Ginpahayag ni Nonoy nga ang opisyo lang sang biktima amo ang pagsag-ob sa aga, pagpadulong sa computer shop, pagbulig sa trabaho sa construction pag-upod sa ila barkada kag kun kaisa, yara lamang nagapabukot sa ila balay.
Sa kadugayon na sang ila pag-abyanay, ginpahayag ni Nonoy nga wala gid siya sang negatibo nga komento batok sa biktima rason nga mistaken identity lamang ang natabo.
