ILOILO – Mismo si Passi City Mayor Stephen Palmares ang mapasaka sang kaso batok sa mga tawo nga hungod nga nagapakamalaot sa mga coronavirus disease 2019 (COVID-19) positive sa amo nga syudad.
Ini ang paandam sang alkalde matapos nabaton ang reklamo nga sunod-sunod ang diskriminasyon nga naangkon sang pamilya sang anay COVID-19 positive nga market vendor sa Passi City.
“Ang tawo nga daya, una bes, indi na man daya gusto nga magpositive sa COVID. Tawo daya sanda nga nagamasakit nga indi nanda gusto. Dapat hangpon naton kag intindihon ya anda nga sitwasyon… indi lang ya tawo nga nagpositive kundi ya ana nga bilog nga pamilya,” pahayag sang alkalde.
Matandaan nga base sa panaysayon ni Regel Planta, residente sang Barangay Agdahon kag bana sang naka-recover na nga 42 anyos nga market vendor, ‘nagasobra na nga pagmulay’ ang nabaton sang iya asawa kun sa diin ginpabati-batian pa sila nga padal-an sang bulak kag patukaran sang disco music kun maubos patay ang ila pamilya.
Pahayag naman ni Mayor Palmares, wala gina-tolerar ini nga mga akto sa amo nga syudad.
“Kabay pa nga indi ko lang maaktuhan. Hay kun may ebidensya ako, ako mismo ya ma-file ka kaso sa mga naga-indiskriminar sa aton nga COVID-19 positive nga subong nag-arayad don.”
Nagpasalig ang alkalde nga kun magbalik na ang 42 anyos nga market vendor sa iya pwesto sa merkado sang Passi City, siya mismo ang magapakig-angot diri.
