ILOILO CITY – Nagutman, nag-ginutok, ka naghinulat nga wala sang kasiguraduhan ang ginabanta 160 ka mga returning overseas Filipinos (ROFs) nga nag-abot sa Iloilo International Airport, Agosto 22.
Sa interview sang Bombo Radyo kay Renato Gullo, isa sa mga repatriates kag residente sang distrito sang Arevalo sa syudad sang Iloilo, iya ginpahayag nga 10:00 kaina sang aga sang nag-abot sila sa airport.
Ang flight ang ginapahayag nga ginproseso sang Overseas Workers Welfare Administration (OWWA) Region VI.
Sang yara na ang mga ini sang airport, ginpahayag ni Gullo nga ginsilingan sila sang isa ka personnel sang OWWA nga wala na sang bakante nga quarantine facility sa syudad kag wala na sila sang sarang matiniran bangud puno na ang mga pasilidad.
“Wala lang kami kabalo kun may gaprocess gid man nga pangitaan kami sang istaran.”
Suno kay Gullo, ang iban nga ROFs nga taga-probinsya sang Iloilo ang ginpasakay na sa bus kag ginproseso sang ila local government unit (LGU) agud makapauli sa ila banwa.
“Kun wala pa gid ni karon kag mahapunan kami di, guyudon na lang ni namon ang trolley bag kag mamato-mato gwa sa airport,” nagalain nga buot nga pahayag sang natungdan.
“MABULIGAY NA LANG KITA” — TREÑAS
Handa ang Iloilo City Government nga buligan ang nasambit nga mga ROFs.
Sa interview sang Bombo Radyo kay Iloilo City Mayor Jerry Treñas, iya ginpahayag nga naka-abiso na siya sa mga opisyal sa Iloilo City Government agud makontak ang mga hotel nga mahimo patiniran sang mga repatriates.
“I already instructed nga mag-contact sa mga hotel kag pangitaan sila sang mga lugar. Sa subong nga tiempo buligay kita, indi kita magpamilit kun mabudlayan ang LGU. Basta indi lang ta pag-i-surprise kag papanaugan memo sang DILG.”
May ara man sang mga resorts sa probinsya suno kay Treñas nga mahimo patiniran sa mga nagaabot nga ‘coordinated’ nga mga ROFs.
Matandaan nga una na nga ginpahayag sang alkalde nga responsibilidad sang OWWA ang mga ROFs samtang salabton naman sang syudad sang mga LSIs.
