ILOILO- Wala nagkulang ang mga opisyal sang mga barangay sa syudad sang Iloilo sa pagpatuman sang mga protocol bilang panaming sa COVID-19.
Sa interview sang Bombo Radyo kay Liga ng mga Barangay President kag Iloilo City Councilor Irene Ong, iya ginpahayag nga ‘terible’ ang pagpaninguha sang mga opisyal apang may mga tawo gid nga dungol kag ‘ginapatalikod lang ang mga compliance officers’ kag lapason naman ang mga pagsulundan.
Ginatumod ni Ong amo ang mga pumuluyo nga wala nagasuksok sang face mask kag wala nagasunod sa physical distancing.
“Kun wala lang sang human rights, nami ni siguro panglatiguhon na lang ini ang mga salawayon,” pahayag sang konsehal.
Kasunod sini, nagpahayag si Ong nga mas maayo na lang kun buy-an ang mga COVID-19 positive sa dalan agud makulbaan ang mga tawo kag indi na magdinungol.
“Ang mga pumuluyo ginasaway man nila (sang mga opisyal) ugaling kay may mga dungol gid. Sa amon na-notice, kun ang barangay may ara positive, ang tawo daw nagabuot. Wala sila naga-gwa sa balay nila kag nagabutang sila sang ila face shield kag nagabutang sila sang face mask. Amo gani nga makahambal ako nga siguro mas maayo nga ang mga positive, buy-an ta sa dalan, para nga indi sila maguluwa kag magbuot sila kay ka dungol gid ya,” dugang sang opisyal.
Liwat nga nag-apelar ang natungdan sa mga pumuluyo nga indi na magdinungol ilabi na kun indi nila luyag nga ipatuman ang lockdown.
“Ang iban nga tawo nanamian pa gid kun may lockdown kay may libre nga pagkaon. Pero indi na ya pirme, indi na ya sige-sige.”
