TUBUNGAN, ILOILO – Natalana nga ipaidalom sa DNA test ang mga tul-an nga nasapwan sa Brgy. Adgao, Tubungan, Iloilo nga ginapatihan iya sang 13 anyos nga dalagita nga nadula duha ka tuig na ang nakaligad.
Sa interview sang Bombo Radyo kay Police Lt. Jose Rommel Samson, hepe sang Tubungan Municipal Police Station, iya ginpahayag nga yara na sa Crime Laboratory sang Police Regional Office 6 ang kalabera kag ginhingyo naman ang pamilya nga magpasa sang dental records agud nga makumpirma nga ila himata ang nasapwan.
Suno kay Samson, ang ebidensya kasubong sang school ID, uniform kag bag nga nakita pila ka metros malapit sa lugar kun sa diin nakita ang kalabera, ang nagasanto sa ginpa-blotter sang amay duha na ka tuig ang nakaligad.
Ginpahayag ni Samson nga apisar sini, kinahanglan sa gihapon nga makumpirma paagi sa DNA test agud nga mahim-os na ang pamilya sang biktima.
Sa subong, desidido ang hepe nga mahatagan sang kasanagan ang natabo sa 13 anyos nga dalagita nga estudyante sang Camangahan National High School sa banwa sang Guimbal.
Wala gid naglaum ang mangunguma nga si Manong Paquing, nga may tawo nga nalubong sa duta nga iya ginatala-uma.
Sa interview sang Bombo Radyo kay Manong Paquing, iya ginpahayag nga sang nakaligad nga mga semana, may napanimahu-an pa sila nga mabaho kag sa pagpangusisa, ila nakita ang bagul apang wala man siya naghuna-huna nga iya ini sang tawo.
Antes pa man sini suno kay Manong Paquing, nakita pa sang iya tiayon nga may school ID kag iya man nakita ang nakasab-it nga bag nga may unod nga school supplies.
Ginpahayag ni Manong Paquing nga bangud sa kasakuon, wala na sila naka-report pa sa pulis.
Suno naman kay Toto, isa sa mga nakakita sa kalabera, nag-upod sila sa iya utod agud nga mangpang-gama sang kawayan tubtub nga ila nakita ang kalabera kag ginkuhaan laragway kag video.
Ginpahayag ni Toto nga pagkatapos sadto, ila nga ginreport sa mga barangay officials ang tuhoy sa ila nakit-an tubtub nga ini ang nakalab-ot na sa mga otoridad.
Emosyonal naman ang utod nga si Agustin Tagnawa Jr. samtang nagapangayo sang hustiya para sa iya utod.
Suno kay Tagnawa, wala sila sang ideya kun sin-o ang nagpatay sa iya 13 anyos nga utod.
Ginpahayag ni Tagnawa nga eskwelahan kag balay lamang ang distinasyon sang biktima.
