ESTADOS UNIDOS – Ginkilala bilang world’s ugliest dog ang isa ka 10-year old hunchback ukon bugtot nga ido sa Estados Unidos.
Ang world’s ugliest dog ang ginkilala nga si Quasimodo, isa ka pitbull-dutch shepherd mix, kun sa diin iya ginlutos ang 25 ka iban pa nga mga ido nga may deperensya ukon pinasahi nga dagway kag nakabaton sang $1,500 ukon kapin sa P73,000.
Si Quasimodo ang gin-abandona sa isa ka animal shelter antes gin-adopt sang isa ka veterinarian nga residente sang Loxahatchee, Florida.
Nakuha naman sang duha ka Chinese Crested kag Chihuahua mixes nga sanday Sweepee Rambo kag Frodo ang ika duha kag ikatlo nga pwesto sa nasambit nga kompetisyon.
Nagbaton man sang Spirit Award ang isa ka 8-year old Chihuahua nga si Precious kag apisar bulag, apang makamonitor ini sang low blood sugar level paagi sa pagpanimaho kag gilayon nga ginapahibalo sa iya amo nga isa ka disabled veteran.
Ang pinasahi nga kompetisyon ang ginhiwat sa Sonoma-Marin Fairgrounds sa Petaluma, California kag ang mga ido ang ginpili paagi sa special ukon unusual attributes, personality kag natural ugliness.
