Makahalawat-hawat kag ginabantayan gid sang bug-os nga Estados Unidos ang presidential debate sa tunga nanday US President Donald Trump kag Democratic presidential nominee Joe Biden.
Ang 90-minute debate ang patigayunon sa Cleveland, Ohio sa Setyembre 29.
Suno kay Bombo International Correspondent Alex Vidal direkta sa New York, mainit nga ginaistoryahan subong sang mga tawo lakip na sang Filipino community ang mga isyu sa amo nga pungsod nga amo ang ginabasehan kun sin-o ang pilion sa tunga sang Republican Leader kag Democratic nominee.
Nagapangibabaw suno kay Vidal ang isyu dala sang coronavirus pandemic kun sa diin sa subong, santo sa data sang Johns Hopkins University, ang Estados Unidos ang nakarecord sang masobra 6.3 million coronavirus cases kag masobra 190,763 ang nagtaliwan.
Nag-gwa man sa isa ka recent survey sang Democracy Fund + UCLA Nationscape Project nga combined 70% sang mga Americans ang nagapati nga mas may simpatiya si Biden sa mga apektado sang pandemya.
66 percent naman ang nagapati nga mas may labot si Biden sa mga nadulaan sang trabaho, samtang 53% naman ang naghatag sang pabor kay Trump.
Ang empathy gap sa tunga sang duha ka presidential candidates ang ginapanan-aw nga makaapekto sa resulta sang eleksyon.
Ang US presidential elections ang patigayunon sa Nobyembre 3. #
