ILOILO CITY – Indi limitado sa isa lang ka locally stranded individual (LSI) ang bulig ni Iloilo City Lone District Representative Julienne ‘Jamjam’ Baronda.
Sa interview sang Bombo Radyo kay Baronda, iya ginpahayag nga handa siya nga buligan ang mga LSIs nga nabudlayan sa mga pantalan kag paluparan sa Metro Manila sa kutob sang iya masarangan.
Ini ang pahayag sang mamalidha kasunod sang pagpahaya ni anay Iloilo City Council Plaridel Nava nga hingyuon na ‘kuntani’ niya ang bulig ni Baronda bangud wala madayon ang iya flight pauli sa Iloilo.
Dugang pa ni Baronda, nakapasa naman sang sulat si Iloilo City Mayor Jerry Treñas sa National Inter-Agency Task Force agud magpaathag nga bukas ang Iloilo City Government sa pagbaton sang mga LSIs kag wala sang moratorium nga ginhingyo ang syudad.
Nahibaluan nga tubtob subong, problema sang mga LSIs sa Metro Manila ang hinali nga kanselasyon sang ila byahe kun sa diin kalabanan sa ila ang nagtinir sa mga paluparan kag pantalan kag nagalaum nga tugtan na nga makabalik sa Iloilo. #
(Photo is grabbed from Jamjam Baronda’s FB Page)
