ILOILO CITY – Kinahanglan nga magsuksok sang uniporme ang mga pulis sa tion nga magpatigayon sang operation.
Ini ang pagpaathag ni Police Regional Office 6 spokesperson Police Lt. Col. Joem Malong may kaangtanan sa reklamo ni Barangay Kagawad Rhomar Martirez sang San Pedro, Molo, Iloilo City may kaangtanan sa ginapahayag pagsulod sang mga personnel sang MORE Electric and Power Corporation sa iya propidad bangud sa isyu sang illegal connection.
Sa interview sang Bombo Radyo kay Malong, iya ginpahayag nga required ang pagsuksok sang uniporme sa tanan nga police operation magluwas lang kun may yara sang intelligence work.
Tuhoy sa reklamo ni Martirez, ginpahayag ni Malong nga ang katuyu-an man lang sang pag-upod sang pulis amo ang pagpasiguro sang peace and order kag indi man ini makabig nga covert operation rason nga required ang pagsuksok sang uniporme.
Ginpahayag ni Malong nga sa pagkamatuod, miyembro sang Task Force Boltahe ang Philippine National Police kag ini ang rason kun nga-a may mga pulis nga naga-upod sa nasambit nga operation.
Ginpahayag nga ang nasambit nga pulis nga nag-upod sa mga personnel sang MORE Power ang na-assign sa Iloilo City Police Office apang nagpamalibad na nga maghatag sang pahayag si ICPO Director Police Col. Eric Dampal.
