ILOILO CITY – Pagadal-on sa La Paz Maternity Clinic ang tanan nga mga COVID-19 positive nga iloy.
Ini ang ginkumpirma sa Bombo Radyo ni Iloilo City Mayor Jerry Treñas kasunod sang reklamo sang pamilya sang isa ka COVID-19 nga pasyente nga ginapahayag ginpabay-an sang medical staff sang St. Therese MTCC Hospital nga nagaserbe nga quarantine facility.
Suno kay Treñas, ang ika-duha nga panalgan sang La Paz Maternity Clinic ang pagahimuon nga quarantine facility samtang pagadal-on naman sa delivery room sa ground floor sa tion nga magbata na ang pasyente.
Ginpahayag ni Treñas nga may ginbakal man nga mga Powered Air Purifying Respirators nga pagagamiton sang mga medical staff.
Kun nagakinahanglan naman sang cesarean ang pasyente, amo na ugaling kag pagadal-on sa hospital para sa nagakaigo nga medical attention.
