ILOILO – Daku ang nabulig sang ginpatigayon nga dry run kag simulation activities sa pagbukas sang school year 2020-2021.
Ini ang ginpahayag ni Dr. Roel Bermejo, Schools Division Superintendent sang Department of Education-Iloilo, may kaangtanan sa assessment sa una nga adlaw sang pagpatigayon sang blended learning sa mga pampubliko nga eskwelahan.
Sa interview sang Bombo Radyo kay Bermejo, iya ginpahayag nga apisar sang mga pagpanghangkat, nangin matalunsay ang pagbukas sang klase bangud sa pagbuligay sang tanan nga stakeholders.
Suno kay Bermejo, 99.9% na ang enrollment turnout halin sa Kindergarten tubtub sa Senior High School kag nagabatonpa ang Department of Education sang late enrollees tubtub sa bulan sang Nobyembre.
Ginpahayag ni Bermejo nga indi malikawan nga may yara sang problema sa pagpatigayon sang home-based learning apang nakahanda na nga daan ang contingency plan sang mga manunudlo.
Bangud nga indi kinaandan ang pagpatigayon sang blended learning sa Pilipinas, ginpahayag sang natungdan nga tuman ka daku ang adjustment sa bahin sang mga estudyante kag sa mga manunudlo.
