ILOILO CITY – Isa si Iloilo City Police Office Director Police Col. Eric Dampal sa 83 ka mga pulis sa Western Visayas nga nagpalista agud maka-avail sang bag-o nga Localization Program sang Philippine National Police.
Sa interview sang Bombo Radyo kay Dampal, iya ginpahayag nga pabor kun pahanugutan siya nga isaylo sa Region 10 agud nga mas malapit sa iya pamilya sa Davao.
Suno kay Dampal, wala man sang may malain sa pagpabutyag sang intensyon nga maka-avail sang Localization Program apang nakadepende sa PNP Headquarters ang approval.
Tuhoy naman sa pamangkot kun ano ang wala niya naluyagan sa syudad sang Iloilo, ginpahayag sang ICPO Director nga wala sang kinamatarong nga magpamalibad ang isa ka pulis tuhoy sa area of assignment.
Suno naman kay Police Regional Office 6 Director Brigadier General Rene Pamuspusan, may yara sang kinamatarong ang tagsa ka pulis nga magpa-reassign.
Ginpahayag ni Pamuspusan nga indi man niya mapunggan si Dampal bangud nga ang PNP Headquarters amo ang nagahatag sang approval kun PNP Localization ang pagahambalan.
Sang nakaligad nga mga semana, ginpahayag ni Pamuspusan nga nag-avail sang sick leave si Dampal apang wala lang siya makahibalo kun ano ang rason sang ICPO Director.
