GUIMARAS – Naglab-ot na sa 116 ang nahatagan sang citation ticket bangud sa paglapas sa “The New Normal” ordinance sa Guimaras.
Sa interview sang Bombo Radyo kay Police Staff Sergeant Randy Centena, officer-in-charge sang Highway Patrol Group sa Guimaras, iya ginpahayag nga santo sa record, 28 ang nahatagan sang citation ticket sa Jordan, 16 sa Buenavista, 15 sa San Lorenzo, 42 sa Sibunag kag 15 sa Nueva Valencia.
Suno kay Centena, sa nasambit nga numero, isa ang ginpasakaan sang kaso bangud sa pagpakatig-a sa pagbayad sang multa.
Ginpahayag ni Centena nga adlaw-adlaw ang ginapatigayon nga pagpatrolya agud masiguro nga ginasunod ang mandatory nga pagsuksok sang face mask, face shield kag ang physical distancing.
Santo sa Provincial Ordinance No. 2020-04 ukon “An Ordinance Prescribing for Measures and Policies Against Emerging and Re-Emerging Infectious Diseases in the Province Thereby Establishing the “New Normal” in Connection Therewith”, P500 ang multa sa first offense, P1,000 sa second offense kag P1,500 naman sa third offense.
