LEMERY, ILOILO – Wala sang may nabaton nga formal complaint si Mayor Oscar Villegas Jr. may kaangtanan sa ginaproblema sang mga residente tuhoy sa tuman ka damo nga langaw sa Brgy. Nasapahan, Lemery, Iloilo.
Ini ang kasunod sang ginpalab-ot nga reklamo sa Bombo Radyo kun sa diin ginatudlo nga rason amo ang mga manukan sa nasambit nga lugar.
Sa interview sang Bombo Radyo kay Villegas, iya ginpahayag nga madugay na nga may manukan sa Brgy. Nasapahan apang sa iya termino, wala sang may nagpalab-ot sang reklamo sa iya.
Suno kay Villegas, iya nga ipa-check sa Municipal Health Officer ang tagsa ka manukan agud mahibalu-an kun ano gid ang ginhalinan sang problema kag kun sanday sin-o ang wala nagasunod sa protocol.
Ginpahayag ni Villegas nga ang iya lamang nga basehan amo ang mangin resulta sang occular inspection agud nga mangin patas sa tanan.
